Беларуская культурная ініцыятыва «Годна» выпусціла кавер на песню палітзняволенага юрыста Максіма Знака «Будзе дзень». Яго як выраз салідарнасці запісалі музыканты — падпісанты «Годна», якія знаходзяцца ў Беларусі, таму выпусціць песню яны з меркаванняў бяспекі змаглі толькі на ўмовах ананімнасці.
Максім Знак, нагадвае «Годна», не толькі вядомы адвакат, але яшчэ і бард. Песню «Будзе дзень» ён заспяваў 30 ліпеня 2020 года на першым вялікім мінскім мітынгу на плошчы Бангалор, дзе тады сабралася каля 16 тысяч чалавек. Песня стала свайго кшталту творчым адлюстраваннем меседжа, які трансляваў Віктар Бабарыка і яго выбарчы штаб.
Максім Знак быў затрыманы 9 верасня 2020 года. Праз год яго разам з Марыяй Калеснікавай, адвакатам якой ён быў, асудзілі на 10 гадоў калоніі па абвінавачанні ў змове з мэтай захопу ўлады, закліках да санкцый і стварэнні экстрэмісцкага фарміравання. Максім Знак знаходзіцца ў калоніі «Віцьба» пад Віцебскам.